ahd-e-junun mein arsa-e-wahshat guzarna
jaise shab-e-visal mein furqat guzarna

jaana suragh-e-jauhar-e-takhliq dhundne
aur us ke baad aalam-e-hairat guzarna

karna hayat pahlu-e-aiwan-e-dard mein
rozana ek roz-e-qayamat guzarna

ab tak to hai urus badan ke nasib mein
zulfon pe khak dalna iddat guzarna

jiwan saza-e-maut se pahle ka khel hai
sab ko hai ye mili hui mohlat guzarna

'akash' daur-e-jabr-o-mashaqqat hai chaar din
phir ta-abad sukun ki haalat guzarna