ahl-e-dil kyunkar rahen rahne ke ye qabil nahin
is jagah pathar bahut milte hain lekin dil nahin

al-madad mauj-e-talatum al-madad dariya-e-ishq
kashti-e-dil kis taraf jae kahin sahil nahin

aur badhna hai abhi aage had-e-idrak se
jis ko main samjha tha manzil wo meri manzil nahin

kya sunaun aap ko main dastan-e-zindagi
mere qabu mein zaban-e-shauq to hai dil nahin

jam bhi hai saqi-e-gul-gun-qaba bhi hai 'riyaz'
jis ko nazren dhundti hain wo sar-e-mahfil nahin