ahrman hai na khuda hai mera dil
hujra-e-haft-bala hai mera dil

mahbat-e-ruh-e-azal mera dimagh
aur aaseb-zada hai mera dil

sar jhuka kar mere sine se suno
kitni sadiyon ki sada hai mera dil

ajnabi-zad hun is shahr mein main
ajnabi mujh se siwa hai mera dil

aao qasd-e-safar-e-najd karen
rah hai rah-numa hai mera dil

chand benam-o-nishan qabron ka
main aza-dar hun ya hai mera dil

na taqaza hai kisi se na talab
muddaa hai na dua hai mera dil

rakh ban ban ke udi hai meri ruh
khun ho ho ke baha hai mera dil

pahle main dil pe khafa hota tha
aur ab mujh se khafa hai mera dal