ai but-e-na-ashna kab tujh se begane hain hum
tu agar is bazm mein mai hai to paimane hain hum

bosa lewen ya gale lag jaen aazurda na ho
chahne wale hain aur diwane mastane hain hum

kab alam aur hasraten apni kahen ai dostan
raat ko bulbul hain hum aur din ko parwane hain hum

ghurne se kya tumhaari aankhon ke hum dar gae
we agar hain mast ai pyare to diwane hain hum

ai 'raza' hum mil gae us se gale pi kar sharab
go hain diwane par apne kaam ke syane hain hum