ai dil ye sai-e-zabt kahin raegan na ho darta hun phir wo dushman-e-jaan mehrban na ho koi batae aisi nazar ko main kya kahun jo raunaq-e-hayat ho taskin-e-jaan na ho be-ikhtiyar jhukne lagi kyon jabin-e-shauq us dushman-e-wafa ka yahi aastan na ho chheda hai main ne qissa-e-musa-o-koh-e-tur us ko hai wahm ye bhi meri dastan na ho hairan hun kaise chashm-e-tamanna ne ki bayan wo ek kaifiyat jo rahin-e-bayan na ho main aur us nigah-e-karam par na jaan dun ye wahm tha ki wo bhi pa-e-imtihan na ho khwahish ye hai ki nazr karun ye mata-e-dil phir sochta hun ek nazar ka ziyan na ho hai ek ada-e-husn hijab-e-nazar-faroz is parda-e-bahaar mein koi nihan na ho mahrumiyon ne ranj ko rahat bana diya ab talkhi-e-hayat bhi shayad giran na ho