ai falak ujlat na kar bijli girane ke liye
chand tinke aur chun lun aashiyane ke liye

zindagi ne pai thin do saaten roz-e-azal
ek gham bahne ko aur ek muskurane ke liye

kya kare jab ishq hi ko tab-e-nazzara na ho
husn khud betab hai jalwa dikhane ke liye

be-hisi se bhi kahin taskhir hota hai jahan
hausla darkar hai duniya pe chhane ke liye

kyon na ai 'talib' dar-e-jaanan pe jhuk jae jabin
hai yahi ek aastan bigdi banane ke liye