ai gham-e-dil ye majra kya hai dard-e-ulfat se wasta kya hai rahne do in hasin wadon ko jhute wade hain sab naya kya hai jam-o-mina ko chhod kar dekho chashm-e-saqi ka ye nasha kya hai shoala-e-gham ko aur bhadkae kaun samjhe ki ye hua kya hai chhin gaya hai sukun bhi mera aashiqi ne mujhe diya kya hai chaaragar koi bhi na jaan saka maut aur ishq ki dawa kya hai kya bharosa hai zindagani ka jaane taqdir mein likha kya hai chashm-e-pur-nam magar labon pe hansi dil mein 'mona' tere chhupa kya hai