basit-e-dasht ki hurmat ko baam-o-dar de de
mere khudaya mujhe bhi to ek ghar de de

bashaaraton ke sahife utar aankhon par
tilsim-e-shab ke kalas tod kar sahar de de

main tera nam likhunga rida-e-kaba par
qalam nasib hai, alfaz mo'tabar de de

ruke hue hain khule paniyon pe barson se
hawaen khol de aur taqat-e-safar de de

har ek shakhs ki patthar uthae phirta hai
ek aaina hi mere shahar ko agar de de

bikhar gaya hun bichhad ke khalaon mein 'ashraf'
ab aae, wo mujhe mujh ko samet kar de de