ai junun hum ne kahan sar rakh diya
phir kisi ko but bana kar rakh diya

'ishq ne mujh ko litaya aag par
aur phir sine pe patthar rakh diya

likh diya tum ne qafas taqdir mein
noch kar main ne bhi shahpar rakh diya

main ne mai chhodi thi jis ke nam par
phir usi ne la ke saghar rakh diya

mujh ko jis se zindagi ki aas thi
us ne hi gardan pe khanjar rakh diya

'shauq' us ke ho gae hum sab yatim
dast-e-shafqat jis ne sar par rakh diya