ai khuda bharam rakhna barqarar is ghar ka
hai tere karam par hi inhisar is ghar ka

har kiwad duba hai be-karan udasi mein
aur har daricha hi sogwar is ghar ka

phailti chali jae bel bad-gumani ki
khatm hi nahin hota intishaar is ghar ka

is jahan mein hoga be-amal na hum jaisa
hum na rakh sake qaem e'tibar is ghar ka

kis qadar gunahon ke murtakib hue hain hum
jo sukun lutta hai bar bar is ghar ka

gard be-yaqini ki gar samet len mil kar
mo'tabar gharon mein ho phir shumar is ghar ka

jaan se guzarne ka hausla ata kar de
ab makin na ho koi sharmsar is ghar ka