ai khwab-e-dil-nawaz na aa kar sata mujhe
hai nind aai tut kar baad-az-qaza mujhe

main to jabin-e-shauq par likhta gaya use
wo bhi nigah-e-naz se padhta raha mujhe

us ki khiram-e-naz pe marte rahe sabhi
lekin nuqush-e-lal mein dekha gaya mujhe

wo zam hue kuchh aise meri kaenat mein
wo hi milenge tum se jo doge sada mujhe

ek phul aur khil gaya ahd-e-bahaar mein
ek sang jab bhi tan ke mara gaya mujhe

'sarwar' ki ek baat ne bedar kar diya
chehre pe sard aab ka chhinta diya mujhe