ai mere ishq mujhe aur be-qarar na kar
wo bewafa hai mohabbat ki had ko par na kar

baghaur dekh mujhe tu ai sang-dil duniya
main ek phul hun is tarah sangsar na kar

wo bewafa hai nahin jab use koi parwah
to apne zehn pe tu bhi use sawar na kar

ajab ye dil hai nahin manta mera kahna
main us se roz ye kahta hun intizar na kar

main aaj us ke khayalon mein jina chahta hun
ki aaj mujh ko pareshan mere yar na kar

ghamon se chaak gareban hai ai sharar 'naqwi'
koi ye us se kahe aur tar tar na kar