ai ranj-e-agahi koi chaara to hoga na
chal khush na rah sakenge guzara to hoga na

ye aarzu bhi waqt ke dhaare mein bah gai
ab nan sahi kabhi wo hamara to hoga na

jati hai jo mata-e-dil-o-jaan to kya malal
ye ishq ki dukan hai khasara to hoga na

har aan jis ka zikr hai us be-niyaz ne
bhule se mera nam pukara to hoga na

main zad-e-rah ke taur pe bas khwab lai hun
ai ham-safar tujhe ye gawara to hoga na

kya ajnabi banenge agar phir kabhi mile
kya baat bhi na hogi ishaara to hoga na

karna karana chhod zabani hi sath de
tinke ka ho agarche sahaara to hoga na