aisa wo zindagi ka qalaq de gaya mujhe
main us ko bhul jaun ye haq de gaya mujhe

us se bichhad ke ho gaya duniya-shanas main
wo sare zindagi ke sabaq de gaya mujhe

pahle to us ne hath mein mere qalam diya
phir chalte chalte sada waraq de gaya mujhe

khud to wo ja ke khak ke bistar pe so gaya
apni bulandiyon ke ufaq de gaya mujhe

kitne hasin us ki mohabbat ke rang the
jab sham ho gai to shafaq de gaya mujhe