aise hi nahin itni ye shauqin hui hai
tahrir meri khun se rangin hui hai

ai aql-e-gunahgar teri baat mein aa kar
shahar-e-dil-e-jazbaat ki tauhin hui hai

guzregi qayamat abhi ek samt guman se
aankhon ko khula rakhne ki talqin hui hai

is shahr-e-dil-azar ke har kuche gali mein
khwabon ki badi dhum se tadfin hui hai

uthta hai diwanon ka yahan roz janaza
ai arz-e-watan tu bhi filistin hui hai

hun is liye 'gulfam' shagufta main gulon se
kanton se mere husn ki tazin hui hai