aise roya ki dil-e-zar ne sone na diya
raat bhar dard ki takrar ne sone na diya

tum jo aae to kahan nind kahan ka aaram
kaif-o-masti bhare israr ne sone na diya

hijr ki aag ne din-raat jalaya hum ko
roz-o-shab dida-e-bedar ne sone na diya

zakhm roe kabhi aankhen to kabhi dil tadpa
ek lamha inhin do-chaar ne sone na diya

us ki yaadon ka har ek naqsh bulata tha mujhe
mujh ko shab bhar dar-o-diwar ne sone na diya

wasl ki raat ajab rang mein guzri 'zakir'
yar ko main ne mujhe yar ne sone na diya