ajab bala ka tasarruf tha khwab par us ka
khuli jo aankh to pahron raha asar us ka

hum apni tab-e-tamasha pe itne khush kyon hain
abhi in aankhon ne dekha kahan hunar us ka

ajab nahin rag-e-gardan jo aap hi tute
udhar kashida bahut ho gaya hai sar us ka

wo raat jis ke liye kaise kaise din kate
wo raat aai to aalam hi tha digar us ka

zaminiyon ki kahan hamsari nasib use
ki hai sada se dimagh aasman par us ka