ajib log hain gul karke zindagi ke charagh
jalae baithe hain apne gharon mein ghi ke charagh

bhatak rahe hain andheron mein mehr-o-mah-o-nujum
har ek samt farozan hain tirgi ke charagh

nazar nazar mein diye hasraton ke larzan hain
qadam qadam pe hain raqsan fasurdagi ke charagh

chaman mein zagh-o-zaghan ki bapa wo shorish hai
ki chhin gae hain anadil se naghmagi ke charagh

bhadak uthi hai dilon mein wo aatish-e-nafrat
ki jal uthe hain labon tak pe tishnagi ke charagh

ye soch len ki udae hansi na baad-e-khizan
karen na ahl-e-chaman gul shaguftagi ke charagh

unhin ke ghar mein andhera hai khun se jin ke
farogh-kash hain shabistan-e-khwajgi ke charagh

muhit khana-e-jaan par hai abr-e-mahrumi
jalao khun-e-tamanna se zindagi ke charagh

uthi hain aandhiyan iblisiyat ki wo 'athar'
laraz rahe hain khudai mein bandagi ke charagh