ajib shor parindon ki us udan mein tha
safar ke baad safar ka maza takan mein tha

hawa chali jo kabhi chaunk chaunk uthta tha
tamam dasht hi jaise kisi ke dhyan mein tha

jo baat us ke mukhalif thi us se kah na sake
ana ka ek samundar bhi darmiyan mein tha

zara si baat pe jo shakhs jaan pe khel gaya
khabar na thi wo bade sakht imtihan mein tha

ye kya ki tu bhi hifazat na kar saka meri
tujhe khabar thi ki main bhi teri aman mein tha