ajib us se bhi rishta hai kya kiya jae
wo sirf khwabon mein milta hai kya kiya jae

jahan jahan tere milne ka hai guman wahan
na zindagi hai na rasta hai kya kiya jae

ghalat nahin mujhe marne ka mashwara us ka
wo mera dard samajhta hai kya kiya jae

kisi pe ab kisi gham ka asar nahin hota
magar ye dil hai ki dukhta hai kya kiya jae

kami na ki thi tawajjoh mein aap ne lekin
hamara zakhm hi gahra hai kya kiya jae

wo meri jaan ka dushman sahi magar yaro
mere liye wahi achchha hai kya kiya jae