aks par yun aankh dali jaegi
samne ki chot khali jaegi

ye qayamat bhi nikali jaegi
us gali se kha ke gali jaegi

kabe mein botal khule mauqa kahan
zamzami se aaj dhaali jaegi

gul to kya hain ta-qafas ai baad-e-tund
patta patta dali dali jaegi

bazm-e-saqi mein agar laghzish hui
hath se mai ki pyali jaegi

gudgudane ko kaf-e-pa dil ke sath
aarzu-e-paemali jaegi

wa dar-e-tauba hai to jaldi hai kya
baat bigdi kuchh bana li jaegi

murda koi aarzu is dil mein hai
kah gae wo jaan dali jaegi

mai-kade hum ghar se jaenge 'riyaz'
ek botal sath khali jaegi