amanat mein khayanat ho rahi hai
saliqe se tijarat ho rahi hai

nahin mahfuz koi apne ghar mein
magar ghar ki hifazat ho rahi hai

sabhi ke khwab ki tabir gham hai
to phir kis ko bashaarat ho rahi hai

hamin ne khun se sincha watan ko
hamin se phir shikayat ho rahi hai

khade hain rahnuma nilam-ghar mein
bahut arzan siyasat ho rahi hai

ba-zahir mil rahe hain sab sabhi se
magar andar baghawat ho rahi hai

'ghazal' sachchai to mahngi padegi
tujhe kaise ye aadat ho rahi hai