andesha-ha-e-roz-e-mukafat aur main
is dil ke be-shumar sawalat aur main

khalq-e-khuda pe khalq-e-khuda ki ye dar-o-gir
hairan khuda-e-arz-o-samawat aur main

kya thi khushi aur us ki thi kya qimat-e-kharid
ab rah gae hain aise hisabaat aur main

har lahza zindagi ki inayat aur wo
har lamha ek marg-e-mufajat aur main

pahle sadaqaton ke wo parchaar aur dil
ab qaul-o-feal ke ye tazadat aur main

haarungi main hi mujh ko ye wahm-o-guman na tha
aapas mein jab harif the haalat aur main

hamraaz-o-ham-sukhan tha magar is ke bawajud
takrae mere dil ke mafadat aur main