apne dil ko nidhaal kya karte
tum se hum arz-e-haal kya karte

hum wafa tark aap se kar ke
apna jina muhaal kya karte

jab kisi kaam ka nahin hai to
dil ki hum dekh-bhaal kya karte

jis ne qadmon mein rakh diya sar ko
us ko hum la-zawal kya karte

ek shahkar jo khuda ka ho
us pe hum kuchh kamal kya karte

aap khud jo misal ho apni
us ko hum be-misal kya karte

tera chehra shafaq ki id bana
dekh kar hum hilal kya karte