tamam 'umr mere dil ko ye ghurur raha
ki ek lamhe ko ye bhi tere huzur raha

junun-e-dil ki hamesha khirad se dur raha
tere huzur raha jab to ba-shu'ur raha

ye tujh se dur raha ya tere huzur raha
'ajab mizaj hai dil ka ki na-subur raha

kab itna hosh mujhe tha ki ab bata bhi sakun
tere qarib raha main ki tujh se dur raha

bas itni yaad hai ab kaifiyat huzuri ki
dil-o-nigah mein ek 'alam-e-surur raha

kisi tarah bhi kahin aur ye raha ho magar
junun mera teri mahfil mein ba-shu'ur raha