apne mazi ko charaghon mein basar hum ne kiya
kat gai raat to didar-e-sahar hum ne kiya

sirf jangen hi nahin jiti hain hain is duniya mein
marka ishq ke maidan ka bhi sar hum ne kiya

dekhne walon ki hairat ka thikana na raha
ek patthar ko jo chamka ke guhar hum ne kiya

chand mein aks nazar aaya hai tera jab se
husn wale tujhe manzur-e-nazar hum ne kiya

kaun sach bolta hai zalim-o-jabir ke khilaf
kaam duniya mein ye be-khauf-o-khatar hum ne kiya

bhul pana use aasan to nahin tha yaro
kaam ye thoda sa mushkil tha magar hum ne kiya

tab kahin ja ke ghazal rang hai lai 'rahbar'
sirf ashaar mein jab khun-e-jigar hum ne kiya