apni aag mein bhunti jae bunti jae kafan apna
goya isi liye chhoda hai chingari ne watan apna

jhonke kuchh be-jaan hawa ke aate hain apne-ap chale
jhum uthte hain chaman ke pankhe us ko jaan ke fan apna

khud-raw sabze chhed rahe hain jangal ke qanun ke rag
kab tak bagh mein padhwaenge khutba sarw-o-saman apna

dariya-dil hai sahil mera magar yahan har sail-e-bala
sail hai ki badha aata hai phailae daman apna

mil to jae apne bhanwar ko dariya ke chakkar se najat
lekin aah agar rah jaun ho kar main hama-tan apna

shama ki lau kya shauq-e-baqa mein shama ko chate jati hai
khud ko tarasti rah jati hai ruh mita ke badan apna

koi 'muhib' aazurda kyun ho meri talkh-kalami se
apni hi jaanib rahta hai akasr ru-e-sukhan apna