bana ke talkh haqaeq se par nikalti hai
chatan mein bhi agar ho khabar nikalti hai

meri taraf se ijazat hai dekh lo khud hi
kahin judai ki surat agar nikalti hai

wo tirgi hai ki khud rah dhundne ke liye
charagh hath mein le kar sahar nikalti hai

ghurur itna bhi kya apni shan shaukat par
ye khush-gumani to katwa ke sar nikalti hai

mere khayal mein taskhir-e-shash-jihat ke liye
teri gali se kahin rahguzar nikalti hai

na raat sunti hai 'rahat' fughan-e-said yahan
na dhup dekh ke zarf-e-shajar nikalti hai