apni dhun mein hi jo chup-chap guzar jata hun
tum samajhte ho bade shauq se ghar jata hun

le ke chal padta hai mujh ko jo khayalat ka rath
jab tere shahar mein pahunche main utar jata hun

apne hi dard ki ungli se laga rahne de
main gham-e-dahr ki is bhid se dar jata hun

koi kis tarah mere jism mein aa jata hai
main badan chhod ke apna ye kidhar jata hun

tum samajhte ho ki ghar laut gaya hai 'azmi'
main to har shab teri dahliz pe mar jata hun