apni tanhai aur gham apne
jo hain hamrah o ham-qadam apne

dur ho jaiye bhala kis se
yaad rahti hai jab baham apne

ishq aur iztirab hain donon
jaanne wale mohtaram apne

aasman ke hasin sahil par
jagmagate rahe the nam apne

nind bhi ek rasta hi to hai
dhundiye khwab dam-ba-dam apne

the kabhi fath-o-sarkhushi ka nishan
hain alam in dinon alam apne

dil mein rahte hain ‘kaamran-nafis'
ghar bhi rakhte hain sath hum apne