apnon ke karam se ya qaza se
mar jaen to aap ki bala se

girti rahi roz roz shabnam
marte rahe roz roz pyase

ai rah-zadagan kahin to pahunche
munh mod gae jo rahnuma se

phir nind uda ke ja rahe hain
taron ke ye qafile nida se

mud mud ke wo dekhna kisi ka
nazron mein wo dur ke dilase

palkon ki zara zara si larzish
paigham tere zara zara se

data hain sabhi nazar ke aage
kya mangen chhupe hue khuda se

kya hath uthaiye dua ko
hum hath utha chuke dua se