ari zindagi gila ab nahin jo hua tha sab wo baja hua
mere pyar ka tha jo karwan wo ruka jahan tha luta hua

meri aarzu thi ki khushnuma ho shagufta gulistan har kuja
to wafa ki rasmen nibah ke mila sahra mujh ko saja hua

meri jaan pe jo guzar gai wo khuda ki nek ata hui
mere aansoon ki nami se dhul ke ye gulistan bhi hara hua

rahe raste bade jaan-sitan hua pur-khatar yun mera safar
ye bhi hausla tha jafa ka jo bhi mila mujhe wo juda hua

mere mathe ki to shikan pe ek baqa be-rahm tha likha hua
likha hath ki jo lakir pe tha wo jab mila to juda hua

are dosto mera dil 'saba' jo nikal kar kabhi dekhna
ye jo tir hai meri zindagi ka yun kab se mujh mein chubha hua