arz-e-matlab ne kiya aur bhi kuchh khwar mujhe
jab bhi milte hain suna dete hain do-chaar mujhe

shauq karta hai agar mail-e-raftar mujhe
rok leta hai mera tauq-e-giran-bar mujhe

chaaragar kaisi dawa chhed na bekar mujhe
chhod bhi de meri haalat pe mere yar mujhe

dekhti hai jo meri nargis-e-bimar mujhe
yaad rahta nahin apna koi aazar mujhe

husn-e-khwabida teri khwab-gah-e-naz mein aaj
le ke aaya hai mera tala-e-bedar mujhe

mohtasib ishq nahin aaina ye mujrim hai
tu kis ilzam mein karta hai giraftar mujhe

nam-e-haq le ke su-e-manzil-e-maqsad hun rawan
na to wahshat hai na khauf-e-rasan-o-dar mujhe

shab gai aai sahar shor-e-azan hai 'agha'
phir kiya nara-e-takbir ne bedar mujhe