asar to jazba-e-zauq-e-darun mein hai magar kam-kam
shab-e-furqat ke maron ko hai ummid-e-sahar kam-kam

fareb-e-husn tewar hi se zahir hai ye diwane
hain andaz-e-bayan-e-husn se waqif magar kam-kam

wahi hai zauq ka aalam hazaron na-muradi par
magar aise bhi ahl-e-zauq aate hain nazar kam-kam

mizaj-e-husn ada-e-husn hi se hain samajh lete
hain aise ba-hunar kam-kam hain aise dida-war kam-kam

kahan wo log jin ko paikar-e-mehr-o-wafa kahiye
agar hain bhi to kah lije ba-andaz-e-digar kam-kam

'zubair' akhbar-e-alam par nazar har ek ki hai lekin
koi hai ba-khabar kam-kam koi hai be-khabar kam-kam