asir-e-wada-e-be-etibar baithe hain
jahan pe chhod gai thi bahaar baithe hain

nasim-e-subh-e-bahaari idhar na aa ki idhar
fareb-khurda-e-fasl-e-bahaar baithe hain

bagule raqs mein phir aa gae hain aur hum log
abhi to jhad ke gard-o-ghubar baithe hain

hai lab pe aah falak par nigah tang zamin
watan-nasib gharib-ud-dayar baithe hain

kabhi to hath pahunch jaega gareban tak
kabhi to aaegi fasl-e-bahaar baithe hain

hain un ke hath shahidon ke khun se tar 'nashtar'
wahi jo surat-e-parwardigar baithe hain