awwal awwal ki jawani mein ubaal aaya tha
baad mein ja ke kahin zabt-e-kamal aaya tha

mere wijdan ne bar-waqt bataya tha mujhe
hijr ka khwab mujhe waqt-e-visal aaya tha

ku-ba-ku phail gai us ke badan ki khushbu
saf lagta hai wahi zohra-jamal aaya tha

khud ko pane ke liye khud mein utar kar apne
bahr-o-bar hath ki chhalni mein khangal aaya tha

waqt ke jabr ki dahliz pe baitha jis dam
gham ki tahrik se khushiyon pe zawal aaya tha

ab to ahbab bhi dam bhar ko thithuk jate hain
jab main aaya tha yahan kitna nihaal aaya tha

'abdi' kaun bataega mere baad use
dubte waqt mujhe us ka khayal aaya tha