azab kaisa ye utra hai aasmanon se
zamin pe khun ki barish hui makanon se

yahi hua hai ki phir laut kar nahin aae
tuyur shab ko jo nikle the aashiyanon se

basiraton ne asar se khabar ko pahchana
ye kashtiyan bahut aage hain baadbanon se

wahi hai un se mera bod-o-qurb ka rishta
zamin ka jaise ta'alluq hai aasmanon se

isi liye to ye sar ab kahin nahin jhukta
jabin-e-shauq hai mayus aastanon se

koi nizam badalna dalil-e-fath nahin
ye sanp bhi to hatae koi khazanon se

mera khulus bhi mashkuk pyar bhi jhuta
jo aaine na tarashun main in chatanon se