azal se le ke abad tak charagh-e-fani hun
hawa ke dosh pe likkhi hui kahani hun

tu jaanta hai meri be-ghari ke qisse ko
main la-makan se makan tak teri kahani hun

main raushni hun main khushbu hun mujh ko dekho to
kahin charagh kahin raat ki main rani hun

main baadalon mein chhupi rahmat-e-khudawandi
kahin ghata to kahin barishon ka pani hun

wo jis ne mujh ko padha hai waraq waraq 'afroz'
usi ki zat mein main gum-shuda kahani hun