azmaton ka dayar ban ke raho
shahr mein shahr-e-yar ban ke raho

khak ban kar bulandiyan chhu lo
raste ka ghubar ban ke raho

main tumhaare liye pareshan hun
tum mere gham-gusar ban ke raho

haar jao to haar mat samjho
jit jao to haar ban ke raho

zindagani hai jang ka maidan
bas yahan aar-par ban ke raho

be-qararon ko kuchh qarar aae
kuchh dinon be-qarar ban ke raho

zindagi khud sharab hai 'andaz'
apna khud hi khumar ban ke raho