baat be-shak na karen aap idhar dekhen to
log kis haal mein hain ek nazar dekhen to

khair hona to wahi hai jo khuda chahega
phir bhi kar sakte hain hum log jo kar dekhen to

tum ne dekha hai wahi khwab jo main ne dekha
is ko kahte hain mohabbat ka asar dekhen to

aap ishrat-kada-e-ghair ki rakhi kar ke
aaen aur aa ke kabhi apna bhi ghar dekhen to

khiragi aur tapish dhup ki hai baad ki baat
pahle ye shab to kate log sahar dekhen to

rang chehron se kai logon ke ud jaega
zikr mera kabhi is bazm mein kar dekhen to

main bhi phir tujh se kahunga ki baha khun baha
teri jaanib wo kabhi dida-e-tar dekhen to

phir wo yun auron pe tanqid ki jurat na karen
apna bhi chaak-e-gareban wo magar dekhen to