bachpan tha wo hamara ya jhonka bahaar ka
laut aae kash phir wo zamana bahaar ka

khidki mein ek gulab mahakta tha samne
barson se band hai wo daricha bahaar ka

kaliyon ka husn gul ki mahak titliyon ka raqs
hai yaad mujh ko aaj bhi chehra bahaar ka

arsa guzar gaya pa lage kal ki baat ho
us bagh-e-husn mein mera darja bahaar ka

daur-e-khizan mein dil ke bahalne ka hai sabab
aankhon mein meri qaid nazara bahaar ka

kaliyan ko baghban hi masalta hai jab kabhi
rota hai zar zar kaleja bahaar ka

marzi pe gulsitan ki bhala kab hai munhasir
aana bahaar ka ya na aana bahaar ka