badal gai tere dil ki faza khuda-hafiz
karenge kya yahan ahl-e-wafa khuda-hafiz

tere siwa bhi kai log mujh se bichhde hain
suna hai main ne kai martaba khuda-hafiz

kisi ne chupke se rasta badal liya apna
kisi ne shor macha kar kaha khuda-hafiz

use likha hai kabhi mujh se rabta na kare
aur ikhtitam mein main ne likha khuda-hafiz

ye kaise waqt pe 'sharjil' tum ne chhod diya
ye kaise waqt pe tum ne kaha khuda-hafiz