badan ko jaan se juda ho ke zinda rahna hai
ye faisla hai fana ho ke zinda rahna hai

yahi nahin ki mere gird khinchni hain haden
mere khuda ne khuda ho ke zinda rahna hai

hazaron log the tauq-e-ana sajae hue
faqat mujhe hi riha ho ke zinda rahna hai

mujhe to khair shab-e-hijr mar dalegi
tumhein to mujh se juda ho ke zinda rahna hai

durust hai ki judai mein maut aa jae
magar ye kya ki khafa ho ke zinda rahna hai

kisi ko maut na aai kisi ke marne par
sabhi ne dukh se siwa ho ke zinda rahna hai