badan pe apne sarapa azab pahne hue
phir aaj nikla hai sahra sarab pahne hue

har ek shakhs ki nazron ko kar gaya uryan
ye kaun guzra yahan se naqab pahne hue

hamare jism ki diwar gir na jae kahin
tumhaare hijr ka mausam hai aab pahne hue

chaman se khushbu nikal kar hawa se puchhti hai
kisi ko dekha hai tum ne gulab pahne hue

hamare takiye pe kal nind sar patakti rahi
hamari aankh thi ek aisa khwab pahne hue

kisi ne hindawi to rekhta kisi ne kaha
zaban-e-urdu hai kya kya khitab pahne hue

koi bhi sinf-e-sukhan is tarah nahin 'dilbar'
ghazal hi tanha hai har ek nisab pahne hue