badan se jaan nikalna chahti hai
bala us ghar se talna chahti hai

yunhi aatish-fishan kab jagte hain
zamin karwat badalna chahti hai

hudud-e-sahn-e-gulshan se nikal kar
saba galiyon mein chalna chahti hai

dhuan sa uth raha hai chaar jaanib
koi surat nikalna chahti hai

hawaon mein nahin quwwat numu ki
magar tahni to phalna chahti hai

jo chehra hai wahan phuli hai sarson
zamin sona ugalna chahti hai