bade yaqin se koi is intizar mein hai
tera visal ka wada isi bahaar mein hai

kuchh aur waqt lagega zara to sabr karo
jo tishnagi ka masiha hai regzar mein hai

main apne dil ko bachaun to kis tarah jaanan
kahan bachega jo teri nazar ki mar mein hai

har ek shai hai meri justuju ke pahlu mein
meri hayat mere hi to ikhtiyar mein hai

mera sawal hai ab moajizon ke hone par
ye khak ab bhi shararon ke intizar mein hai

bas ek lafz ne tari kiya tha wajd koi
ye kaenat abhi bhi usi khumar mein hai

koi to puchh ke aae maqam 'kafir' ka
sukhnawaron ke qabile mein kis shumar mein hai