badi latif kashish thi hasin panah mein tha
khuli jo aankh to main apni khwab-gah mein tha

hadis-e-ahd-e-masarrat meri nigah mein thi
ki ek paikar-e-raana dil-e-tabah mein tha

tula hua tha kabhi jaan lene dene par
ajib rang-e-wafa us ke intibah mein tha

har ek samt thi us ki nigah patthar ki
wo sang-dil barahna jo shahrah mein tha

meri hayat hi qatil sahi magar 'mutrib'
bade sukun se main apni qatl-gah mein tha