bagh patjhad mein bayaban bhi ho jata hai
dil jo aabaad hai viran bhi ho jata hai

raat kyon khauf ke sae mein guzari jae
wo jo hona ho kisi aan bhi ho jata hai

ibn-e-adam hai ise jaanch parakh le pahle
ye jo darwesh hai sultan bhi ho jata hai

is qadar ranj meri jaan khasare pe na kar
faede mein kabhi nuqsan bhi ho jata hai

dil wo rasta hai jahan rahti hai raunaq din bhar
sham hoti hai to sunsan bhi ho jata hai