bahaar aai junun lega hamara imtihan dekhen
namak dega dil-e-zakhmi ko shor-e-bulbulan dekhen

siya hai zakhm-e-bulbul gul ne khar aur bu-e-gulshan se
sui taga hamare chaak-e-dil ka hai kahan dekhen

hamein dil-sozi hamesha yahan tak din o iman hai
ki ji jalta hai jab hum bulbul-e-fasl-e-khizan dekhen

guzar jati hai dil se tir ho kar yaad us qad ki
jahan ham-dosh-e-ashiq hum koi abru-kaman dekhen

huma se bach ke mujh majnun ko daulat ishq ki ho jo
sag-e-laila ki qismat honge mere ustukhan dekhen

chala hun 'uzlat' ab sahra bagule ki ziyarat ko
milega tauf ko majnun ka barbaad aastan dekhen