bahaar aai magar khayali
saba ne phulon pe khak dali

main kis ko apna harif samjhun
ki sab ki surat hai bholi-bhaali

haqiqaton pe nigah rakkho
nahin hai sab kuchh yahan khayali

kali ne shayad ki pat hain khole
asar chaman mein hai dali dali

na barq-e-sozan na baad-e-sar-sar
gulon ka qatil chaman ka wali

wahi hai sab se azim fateh
wo aaj jis ne haya bacha li

koi na hoga harif 'arif'
jo us ne tegh-o-sipar sambhaali